Dr. Govinda KC

चिकित्सा शिक्षा सुधारका अभियन्ता डा. गोविन्द केसीले चिकित्सा शिक्षासम्बन्धी जाँचबुझ आयोगको प्रतिवेदन कार्यान्वयन गर्न माग गरेका छन्।

शनिबार काठमाडौंको माइतीघरमा प्रर्दशनसहित पत्रकार सम्मेलन गर्दै चिकित्सा शिक्षासम्बन्धी जाँचबुझ आयोगले कारवाही सिफारिस गरेकालाई कारवाही गर्न र यसअघि आफुसंग भएका माग पुरा गर्न माग गरेका हुन्।

उनले आफूले अघि सारेका बिषयलाई सम्बोधन गर्न सरकारलाई तीन साताको अल्टिमेटम समेत दिएका छन्। प्रतिवेदन सार्वजनिक भैसकेको अवस्थामा त्यसका सुझावअनुसार तुरुन्त दोषीहरू उपर कारबाही गर्नुपर्ने, विश्वविद्यालयलाई राजनीतिक भागबण्डामुक्त गर्नुपर्ने माग उनले गरेका छन्।

अहिले नेपालमा राजनीतिको चरम भ्रस्टीकरण,अपराधीकरण, माफियाकरण र दलालिकरण भन्दै उहाले भ्रष्टाचार गर्ने नेता कार्यकर्तालाई कारबाही गर्नुपर्ने उनले बताए।

प्रत्येक प्रदेशमा कम्तिमा एउटा साथै इलाम, उदयपुर र डडेल्धुरामा एक एक वटा मेडिकल कलेज तथा प्रतिष्ठान निर्माण गरेर संचालनमा ल्याउने सहमति पनि कार्यान्वयन नभएको उनको भनाइ छ ।

हाल सत्ताको नेतृत्व गरेकाले आफ्नो दण्डहीनताका लागि सिंगो संक्रमणकालीन न्याय प्रक्रियालाई भद्दा मजाकमा परिणत गरेको उनले आरोप लगाए।

उनले तीन हप्ता भित्र नागरिक अधिकार, सशस्त्र द्वन्द कालका पिडितलाई न्याय र पीडकलाई सजाय, कार्की आयोगले दोषी ठहर्‍याएका व्यक्तिहरूलाई कारवाही तथा सवै नेपालीलाई निशुल्क उपचार सम्बन्धी मागहरु पुरा गर्नुपर्ने बताए।

यसलाई सरकारले गम्भीरतपूर्वक नलिए सत्याग्रह लगायतका सशक्त दवाबमुलक कार्यक्रम शुरु गर्न वाध्य हुने डा.केसीले चेतावनी दिए।