राष्ट्र बैंकले व्यक्तिगत मार्जिन कर्जाको सीमा १५ करोड रुपैयाँबाट २५ करोड रुपैयाँ पुर्याएको छ । मौद्रिक नीतिमा परेको बुँदालाई बुधबार बैंक तथा वित्तीय संस्थाहरुलाई एक सर्कुलर जारी गरी २५ करोड रुपैयाँसम्म व्यक्तिगत मार्जिन कर्जा दिन सक्ने जानकारी दिएको हो ।
त्यसैगरी पहिलो आवासीय घर कर्जाको सीमा २ करोड रुपैयाँबाट बढाएर ३ करोड रुपैयाँ पुर्याइएको छ भने यस्तो कर्जामा बैंकले ८० प्रतिशतसम्म कर्जा दिन पाउने व्यवस्था गरिएकोछ । यसअघि लोन टु भ्यालु रेसियो ७० प्रतिशत मात्रै थियो । रियल स्टेट कर्जाको लागि लोन टु भ्यालु ५० प्रतिशत तथा अन्य निजी आवासीय घर कर्जाको लागि लोन टु भ्यालु रेसियो ७० प्रतिशत कायम रहेको छ । यसअघि रियल स्टेट कर्जाको लागि ५० प्रतिशत नै रहे पनि अन्य निजी आवासीय घर कर्जाको हकमा ६० प्रतिशत मात्रै थियो ।
