लगानीकर्ताले लामो समयदेखि माग गरिरहेको मार्जिन कर्जाको व्यक्तिगत सीमा खारेज सँगै बैंकहरुले शेयर खरिद गरेर १ वर्षसम्म होल्ड गर्नुपर्ने प्रावधानलाई घटाएर ६ महिना पुर्याउन सर्कुलर जारी गरेपछि बिहीबारको बजार पहिलो ३ मिनेटमा ४ प्रतिशत अर्थात सेन्चुरीले बढ्यो ।
त्यसपछि भने विस्तारै शेयर सेलिङ बढेर अन्त्यमा २२.५९ अंकको वृद्धिमा नेप्से सीमित रह्यो । दशैंपछि दुई दिनको कारोबारमा १०० अंकभन्दा धेरैले घटेको थियो भने कार्यदलको सुझावअनुसार बुधबार राष्ट्र बैंकले सर्कुलर जारी गरेपछि लगानीकर्तामा उत्साहको सञ्चार भएको थियो । त्यो उत्साह बिहीबारको कारोबारको अन्तिम समयसम्म टिक्न सकेन ।
बिहीबार शेयर बजार परिसूचक नेप्से २२.५९ अंकले बढेर २५८२.१८ बिन्दुमा पुगेको छ । बिहीबार कुल २५१ सूचीकृत कम्पनीको सेयर कारोबार हुँदा २०० कम्पनीको शेयरमूल्य बढेर बन्द भएको छ । त्यस्तै ४१ कम्पनीको सेयरमूल्य घटेर बन्द हुँदा १० कम्पनीको स्थिर छ ।
तरल राजनीतिक अवस्थाका बीच बजारमा लगानीकर्ताले लामो समयदेखि माग गर्दै आएको मार्जिन कर्जाको सीमा हटाउन, बैंकलाई ट्रेडिङ गर्न सहजीकरण गर्नेलगायतका नीतिगत परिवर्तन हुँदा पनि बजार बढ्न सकेन । नेपाल इन्भेष्टर्स फोरमका अध्यक्ष तुलसीराम ढकालले लगानीकर्ताको माग बमोजिम राष्ट्र बैंकले नीतिगत सहजीकरण गरिदिएको भए पनि तरल राजनीतिक अवस्था, फेस्टिभ मुडमा रहेको लगानीकर्ताको अवस्था र असोज मसान्तको प्रेसरले बजारमा दबाब पर्दा बजारले सोचे अनुसार प्रदर्शन गर्न नसकेको बताए । उनले भने–‘लगानीकर्ताले मागे अनुसार मार्जिन कर्जाको सीमा हटे पनि तरल राजनीतिक अवस्था तथा फेस्टिभ मुड र मसान्तको प्रेसरले बजारलाई असर गरेको हो । तिहारलगत्तैको कारोबार भने सकारात्मक रुपमा अगाडि बढ्नेमा आशावादी छु ।’
धेरै लगानीकर्ताहरुले जेनजी आन्दोलनका कारण उद्योग व्यवसायलाई निरन्तरता दिनु भन्दा शेयर बजारलाई सुरक्षित मानेर आउने अपेक्षा गरेका छन् । अहिले बैकिङ प्रणालीमा तरलता थुप्रिएर बसेको छ । बैंकमा राखेको रकमले अत्यन्तै न्यून प्रतिफल दिइरहेको छ । यस्तो अवस्थामा शेयर बजार एक मात्रै विकल्प रहेको हुँदा बजार बढ्नै पर्ने दबाबमा रहेको बताउँछन् ।
गत साउनमा ३ हजारको विन्दु छोएपछि घट्न थालेको शेयर बजारमा जेनजी आन्दोलन र बाढी पहिरोको कारण क्रमिक रुपमा घट्दै जाँदा लगानीकर्ताले कमाउन सकेका थिएनन् । ऋणमा लगानी गर्ने लगानीकर्तालाई अहिले असोज मसान्तमा ऋणको व्याज बुझाउनुपर्ने प्रेसरका कारण पनि बजार बढ्न नसकेको लगानीकर्ता सुन्दर रायमाझीले बताए ।
लगानीकर्ता रोहन कार्कीले राष्ट्र बैंकको सर्कुलर एकदमै बजार मैत्री भएपनि सर्कुलर आएको समयका कारण त्यसले राम्रो पर्फम गर्न नसकेको बताए । उनले भने–‘जहिले पनि दशैं तिहारको बीचमा बजार साइडवेजमै बस्ने गरेको छ । बिहीबार बजार एकदमै उतारचढाव आउनुमा भने राष्ट्र बैंकको सर्कुलर र सेबोनको सुधारको कार्यक्रम अगाडि बढाउने भन्ने समाचारले भूमिका खेलेको छ । सर्कुलरको प्रभावमा एकथरी लगानीकर्ताले शेयर किने भने मसान्तको प्रेसरमा र विगतमा घटेको बेला शेयर किनेकाले शेयर बेच्दा उतारचढाब देखिएको हो ।’ लगानीकर्ताले माग गरेका अधिकांश नीति राष्ट्र बैकले सर्कुलर मार्फत लागू गरिसकेको हुँदा फेस्टिभ सिजन र मसान्तको प्रेसरपछि बजारले माथिल्लो विन्दु नै छुनेमा आशावादी रहेको उनले बताए।-merolagani
