सोलुखुम्बुस्थित सगरमाथा आधार शिविरनजिकै लबुचेमा आज (बुधबार) बिहान अल्टिच्युड एयरको हेलिकप्टर दुर्घटना भएको छ।
नागरिक उड्डयन प्राधिकरणका सूचना अधिकारी ज्ञानेन्द्र भुलका अनुसार लुक्ला-लबुचे (उद्धार उडानका लागि) गएको अल्टिच्युड एयरको नाइनएन-एएमएस हेलिकप्टर दुर्घटनामा परेको हो।हेलिकप्टरमा क्याप्टेन विवेक खड्का मात्रै थिए।
उनी सकुशल रहेको प्राधिकरणका सूचना अधिकारी भुलले जानकारी दिए।
सोलुखुम्बुका प्रमुख जिल्ला अधिकारी लीलाकुमारी केसी पाण्डेका अनुसार बिहान ७:५० बजेतिर खुम्बु पासाङल्हामु गाउँपालिका-५ लबुचेमा हेलिकप्टर दुर्घटना भएको हो।
‘यात्रु लिन जाँदा ल्यान्ड गर्ने क्रममा हेलिकप्टर हेलिप्याडमा हिउँमा चिप्लिएको हो’, उनले भनिन्, ‘हेलिकप्टरमा चालक (विवेक खड्का) मात्रै थिए, उनको सकुशल उद्धार गरिएको छ।’
